गणेश स्तवराज गणेशाष्टक पाठ विधि फल और सात मुद्राएं

ॐमूल मंत्र

विनायकैक-भावना-समर्चना-समर्पितं,
प्रमोदकैः प्रमोदकैः प्रमोद-मोद-मोदकम् ।
यदर्पितं समर्पितं नवान्नधान्यनिर्मितं
न खण्डितं न खण्डितं न खण्डमण्डनं कृतम् ॥१॥

सजातिकृद्-विजातिकृत् स्वनिष्ठभेदवर्जितं,
निरंजनं च निर्गुणं निराकृति-प्रनिष्क्रियम् ।
सदात्मकं चिदात्मकं सुखात्मकं परं पदं,
भजामि तं गजाननं स्वमाययात्त-विग्रहम् ॥२॥

गणाधिप त्वमष्टमूर्तिरीशसूनुरीश्वर-
स्त्वमम्बरं च शम्बरं धनञ्जयः प्रभञ्जनः ।
त्वमेव दीक्षितः क्षितिर्निशाकरः प्रभाकर-
श्चराचरप्रचारहेतुरन्तरायशान्तिकृत् ॥३॥

अनेकदं तमालनीलमेकदन्तसुन्दरं,
गजाननं नमो गजाननामृताब्धिचन्द्रमम् ।
समस्तवेदवाद - सत्कला - कलापमन्दिरं,
महान्तरायकृत् तमोऽर्कमाश्रितोन्दुरं पुरम् ॥४॥

सरत्नहेमघण्टिकानिनादनूपुरस्वन-
मृदङ्गतालनादभेदसाधनानुरूपतः ।
धिमिद्धिमित्तथोङ्कथोङ्गथेयि-थेयिशब्दतो,
विनायकः शशाङ्कशेखरः प्रहृष्य नृत्यति ॥५॥

सदा नमामि नायकैकनायकं विनायकं
कलाकलापकल्पनानिदानमादिपुरुषम् ।
गणेश्वरं गणेश्वरं महेश्वरात्मसम्भवं,
स्वपादपद्मसेविनामपारवैभवप्रदम् ॥६॥

भजे प्रचण्डतुन्दिलं सदन्दशूकभूषणं,
सनन्दनादिवन्दितं समस्तसिद्धसेवितम् ।
सुरासुरौघयोः सदा जयप्रदं भयप्रदं,
समस्तविघ्नघातिनं स्वभक्तपक्षपातिनम् ॥७॥

कराम्बुजातकङ्कणः पदाब्जकिङ्किणीगणो,
गणेश्वरो गुणार्णवः फणीश्वराङ्गभूषणः ।
जगत्त्रयान्तरायशान्तिकारकोऽस्तु तारको,
भवार्णवस्थघोरदुर्गहा चिदेकविग्रहः ॥८॥

यो भक्तिप्रवणश्चराचरगुरोः स्तोत्रं गणेशाष्टकं,
शुद्धः संयतचेतसा यदि पठेन्नित्यं द्विसन्ध्यं पुमान् ।
तस्य श्रीरतुला स्वसिद्धिसहिता श्री शारदा सर्वदा,
स्यातां तत्परिचारिके किल तदा काः कामनानां कथाः ॥