मुक्तिचिन्तामणि गायत्री कवच पाठ और धारण विधि -रुद्रयामल तंत्र

ॐमूल मंत्र

मुक्तिचिन्तामणि गायत्री-कवचम्

श्रीदेव्युवाच--
भगवन् सर्वलोकेश, वेदतत्त्वाधिसागर ।
सर्वज्ञ भैरवेशान, जगन्नाथ कृपानिधे ॥१॥

कवचं देव गायत्र्याः, सर्वतत्त्वमयं परम् ।
मुक्तिचिन्तामणि नाम, त्वया मे प्राङ्निवेदितम् ॥२॥

मन्त्रगर्भं सुरैः पूज्यं, सर्वापत्तारणं विभो! ।
ब्रह्मवेदमयं ब्रूहि, यद्यहं तव वल्लभा ॥३॥

श्रीभैरव उवाच
शृणु देवि! प्रवक्ष्यामि, तव स्नेहाद् रहस्यकम् ।
कवचं तत्त्वभूतं ते, सर्वमन्त्रैक-विग्रहम् ॥४॥

मुक्तिचिन्तामणि नाम, गायत्रीमन्त्र-विग्रहम् ।
मातृकाबीजनिलयं, व्याहृतिब्रह्मसम्मितम् ॥५॥

सर्वशक्तिमयं देवि!, सर्वारिष्टविमर्दनम् ।
महापातकविघ्नौघ--ब्रह्महत्यादिनाशनम् ॥६॥

विनियोगः--
ॐ अस्य श्रीकवचस्यापि, ऋषिः प्रोक्तः सदाशिवः ।
गायत्रीदेवता देवि, बीजं प्रणव ईरितः ॥७॥
लक्ष्मीशक्तिः शिवा भीमा कीलकं समुदाहृतम् ।
धर्मार्थकाममोक्षार्थे, विनियोगस्तु धारणे ॥८॥

एवं विनियुज्य--
ॐ अं शिरो मेऽवताद्देवी, गायत्री परमार्थदा ।
ॐ आं सौः मेऽवताद्देवी, भालं वेदार्थसुन्दरी ॥१॥
ॐ इं हसौः भ्रुवौ पातु, मम तन्त्रार्थसुन्दरी ।
ॐ ईं सौः नयने पातु, मम व्याहृतिसुन्दरी ॥२॥
ॐ उं ऐं मेऽवतात् कर्णौ, सदा भूर्लोकसुन्दरी ।
ॐ ऊं क्लीं मेऽवताद् गण्डौ, श्रीभुवोलोकसुन्दरी ॥३॥
ॐ ऋं श्रीं मेऽवताद् नासां सा स्वर्लोकैकसुन्दरी ।
ॐ ॠं ह्रीं मेऽवतादोष्ठौ महर्लोकैकसुन्दरी ॥४॥
ॐ लृं ग्लौं मेऽवताद्दन्तान् जनलोकैकसुन्दरी ।
ॐ लॄं ग्लौं मेऽवताज्जिह्वां, तपोलोकैकसुन्दरी ॥५॥
ॐ एं गां पातु मे वक्त्रं सत्यलोकैकसुन्दरी ।
ॐ ऐं यं पातु मे कण्ठं, सदाभुवनसुन्दरी ॥६॥
ॐ ओं त्रीं पातु मे स्कन्धौ, सदा ब्रह्माण्डसुन्दरी ।
ॐ औं श्रीं पातु मे बाहू, सदा सर्वाङ्गसुन्दरी ॥७॥
ॐ अं श्रीं पातु मे हस्तौ, सदा सर्वार्थसुन्दरी ।
ॐ अः ह्लौं पातु मे वक्षः, सदा देवेन्द्रसुन्दरी ॥८॥
ॐ कं श्रीं पातु मे पृष्ठं, सदा दानवसुन्दरी ।
ॐ खं श्रीं पातु मे पार्श्वौः श्रीविद्याधरसुन्दरी ॥९॥
ॐ गं ह्रीं पातु मे कुक्षी, अप्सरोलोकसुन्दरी ।
ॐ घं ऐं पातु मे नाभिं, यक्षलोकैकसुन्दरी ॥१०॥
ॐ ङं प्रीं मेऽवतान्मेढ्रं, रक्षोलोकैकसुन्दरी ।
ॐ चं स्त्रीं मेऽवताच्छिश्नं, सदा गन्धर्वसुन्दरी ॥११॥
ॐ छं हां पातु मे ऊरू, सदा गुह्यकसुन्दरी ।
ॐ जं स्वा पातु मे जानू, सिद्धलोकैकसुन्दरी ॥१२॥
ॐ झं ह्लीं पातु मे तत्र पृथुलं मांस-सञ्चयम् ।
ॐ ञं ऐं पातु मे तत्र, दृढमस्थिचयं सदा ॥१३॥
ॐ टं स्त्रीं पातु मे जङ्घे, भूतलोकैकसुन्दरी ।
ॐ ठं प्रिं पातु मे गुल्फौ, नागलोकैकसुन्दरी ॥१४॥
ॐ डं ऐं पातु मे पादौ, मर्त्यलोकैकसुन्दरी ।
विस्मारितं च तत्स्थानं, यत्स्थानं नामवर्जितम् ॥१५॥
ॐ ढं ह्रीं पातु तत्सर्वं वपुस्त्रिपुरसुन्दरी ।
ॐ णं ह्रीं पूर्व इन्द्रोऽव्यात्, ॐ तं श्रीं अग्निरग्रतः ॥१६॥
ॐ थं ह्रीं दक्षिण धर्मो, ॐ दं श्रीं नैऋत्यां स्वतः ।
ॐ धं श्रीं श्री वरुणः पातु पश्चिमे मां जलेश्वरः ॥१७॥
ॐ नं श्रीं वायुतो वायुर्वायव्ये मां सदाऽवतु ।
ॐ पं श्रीं मामुदरे पातु कुबेरो यक्षराट् सदा ॥१८॥
ॐ फं यं मामीश्वरः पातु स्वयमीशाननायकः ।
ॐ बं गां ऊर्ध्वमात्मभूर्भगवान् सर्वदाऽवतु ॥१९॥
ॐ भं ग्लौं पातु मां विष्णुरधस्तात् सर्वदा हरिः ।
ॐ मं भैं मे गुरुः प्रातः, ॐ यं श्रीं मां मध्यवासरे ॥२०॥
ॐ रं ह्रीं मेऽवताद् सायं परात्पर-गुरुस्तथा ।
ॐ लं क्लीं मां निशीथेऽव्यात् परमेष्ठि गुरुः सदा ॥२१॥
ॐ वं ऐं मां निशीथान्ते पातु साधक-नायकी ।
ॐ शां श्रीं मां भगवती ब्रह्मरूपा दिनेऽवतु ॥२२॥
ॐ षं ह्रीं मां जगन्माता विष्णुरूपा सदाऽवतु ।
ॐ सं ऐं मां वेदमाता शिवरूपा सदाऽवतु ॥२३॥
ॐ हं श्रीं मां चक्रतः पातु गायत्री चक्रनायकी ।
ॐ मूलं लं क्ष रूपं मां पायात् सदा सद्ब्रह्मनायकी ॥२४॥
लक्ष्मीर्लक्ष्मी सदा पातु, कीर्तिः कीर्तिः सदाऽवतु ।
धृतिर्धैर्यं सदा पातु, धन्या भाग्यं ममाऽवतु ॥२५॥
स्थितं स्थिता सदा पातु, शान्तिः शान्तिं प्रयच्छतु ।
विभा दीप्तिं सदा पातु, मतिवृद्धिं ममाऽवतु ॥२६॥
गतिर्गति च मे पातु, श्रान्तिः श्रान्तिं सदाऽवतु ।
नतिर्नति च मे पातु, वाणी वाणीं प्रयच्छतु ॥२७॥
सेना सेनाधिपत्यं मे, शोभा शोभां प्रयच्छतु ।
क्रियादेवी क्रियासिद्धिं, नुतिर्नुतिं प्रयच्छतु ॥२८॥
एताः षोडशपत्रस्थाः, पान्तु मां सर्वतोभयात् ।
ब्राह्मी पूर्वदले पातु, वह्नौ नारायणी तथा ॥२९॥
दक्षिणे पातु मां चण्डी, नैऋते शाम्भवी तथा ।
पश्चिमेऽपराजिताऽव्यात् कौमारी वायुकोणतः ॥३०॥
वाराही चोत्तरे पातु, ईशाने नारसिंहिका ।
रुरुः संग्रामतः पातु, चण्डो भूपभयात् सदा ॥३१॥
करालोऽव्यात् श्मशाने मां संहारोऽव्यात् समुद्रतः ।
भीषणः पातु दुर्भिक्षात्, कालाग्निः कालपाशतः ॥३२॥
उन्मत्तः पातु मां चौरात् क्रोधोऽव्यान्मां विपत्तितः ।
एते सशक्तिकाः पान्तु, वसुपत्रेषु भैरवाः ॥३३॥
सरस्वती गिरं पातु, सती सत्यं सदाऽवतु ।
दुर्गा दुर्गतितो रक्षेत्, सावित्री वसु रक्षतु ॥३४॥
श्रीब्रह्मवादिनी ज्ञानं, श्रीमती शिवमुक्तभाम् ।
कुब्जिका च कुलं क्षिप्रं, पाशं संसारबन्धनात् ॥३५॥
तारिणी चरितो रक्षेद् ध्रुवं मां विश्वमंगला ।
बहिर्दशार-चक्रस्था, पातु मां सर्वतः सदा ॥३६॥
त्रिपुरा पातु मां नित्यं, कालिकाऽवतु मां सदा ।
तारा मां पातु सततं, सखी च सर्वदाऽवतु ॥३७॥
बगला पातु मां नित्यं, बाला मां पातु सर्वतः ।
वैखरी पातु मां नित्यं, देवी तुर्या सदाऽवतु ॥३८॥
छिन्नशीर्षावतां नित्यं, पातु मां भुवनेश्वरी ।
अन्तर्दशारचक्रस्था, देवता पातु मां सदा ॥३९॥
गंगा मां पावनं पातु, यमुना पातु सर्वदा ।
सरस्वती च मां पातु, त्रिकोणस्थाश्च देवताः ॥४०॥
मूलविद्या च मां पातु, गायत्री त्रिपदास्तवा ।
चतुर्मुखः शिवः पातु, पातु पद्मासनः प्रभुः ॥४१॥
अक्षसूत्रं च मां पातु, पद्मं पातु शिवप्रियः ।
त्रिशूलं सर्वदा पातु, लगुडं पातु सर्वदा ॥४२॥
मूलं च सर्वदा पातु, चतुर्विंशाक्षरात्मकम् ।
सर्वत्र सर्वदा पातु, परमार्थाधिदेवता ॥४३॥
इति मन्त्रमयं दिव्यं, कवचं देव-दुर्लभम् ।
गायत्र्यास्त्रिपदा देव्या, लयांगनिलयं परम् ॥४४॥
मूलविद्यामयं ब्रह्म, विद्यानिधिमयं परम् ।
सर्वदेवप्रियं मुक्तेः, साधनं भुक्ति-वर्धनम् ॥४५॥
मुक्ति-चिन्तामणिर्नाम, गायत्री-तत्त्वकारिणी ।
मारणं सर्व-शत्रूणां, वारणं सकलापदाम् ॥४६॥
तारणं च भवाम्भोधेः, सर्वैश्वर्यैककारणम् ।
रवौ यो ह्यष्टगन्धेन, लिखेद् भूर्जे महेश्वरि! ॥४७॥
श्वेतसूत्रेण संवेष्ट्य, सौवर्णेनाथ वेष्टयेत् ।
पञ्चगव्येन संशोध्य, गायत्रीरूपेण स्मरेत् ॥४८॥
तामर्चयेन्महादेवि! विद्यया यन्त्रराजवत् ।
मकारः पंचभिर्गोप्ये महाचर्नक्रमेश्वरः ॥४९॥
यथार्थतस्तत् सम्पूज्य, गुटिं भोगापवर्गदाम् ।
बध्नीयात् कण्ठदेशे तु, सर्वसिद्धिः प्रजायते ॥५०॥
शिरःस्था गुटिका देवि, राजलोक-वशंकरी ।
भूतस्था गुटिका देवि! रणे विजयदायिनी ॥५१॥
कुक्षिस्था रोगशमनी, वक्षःस्था पुत्र-पौत्रदा ।
कण्ठस्थैश्वर्यदा लोके, सर्व-सारस्वत-प्रदा ॥५२॥
इत्येवं कवचं देवि! गायत्रीतत्त्वमुत्तमम् ।
गुह्यं गोप्यतमं देवि! गोपनीयं स्वयोनिवत् ॥५३॥

[इति श्रीरुद्रयामले तन्त्रे गायत्रीकवचं समाप्तम्।]