आपदुद्धारक भैरव 108 नामावली मंत्र -रुद्रयामल तंत्र

ॐमूल मंत्र

ॐ ह्रीं भैरवो भूतनाथश्च भूतात्मा भूतभावनः।
क्षेत्रज्ञः क्षेत्रपालश्च क्षेत्रदः क्षत्रियो विराट् ॥१॥

श्मशानवासी मांसाशी खर्पराशी स्मरान्तकः।
रक्तपः पानपः सिद्धः सिद्धिदः सिद्धसेवितः ॥२॥

कङ्कालः कालशमनः कलाकाष्ठातनुः कविः।
त्रिनेत्रो बहुनेत्रश्च तथा पिङ्गल-लोचनः ॥३॥

शूलपाणिः खड्गपाणिः कङ्काली धूम्रलोचनः।
अभीरुर्भैरवीनाथो भूतपो योगिनीपतिः ॥४॥

धनदोऽधनहारी च धनवान् प्रतिभानवान्।
नागहारो नागपाशो व्योमकेशः कपालभृत् ॥५॥

कालः कपालमाली च कमनीयः कलानिधिः।
त्रिलोचनो ज्वलन्नेत्रस्त्रिशिखी च विलोचनः ॥६॥

विनीततनयो डिम्भशान्तः शान्तजनप्रियः।
बटुको बहुवेशश्च खट्वाङ्गी वरधारकः ॥७॥

भूताध्यक्षः पशुपतिभिक्षुकः परिचारकः।
धूर्तो दिगम्बरः शूरो हरिणः पाण्डुलोचनः ॥८॥

प्रशान्तः शान्तिदः शुद्धः शङ्कर-प्रियबान्धवः।
अष्टमूर्तिनिधीशश्च ज्ञानचक्षुस्तपोमयः ॥९॥

अष्टाधारः षडाधारः सर्पयुक्तः शिखीसखः।
भूधरो भूधराधीशो भूपतिर्भूधरात्मजः ॥१०॥

कङ्कालधारी मुण्डी च आन्त्रयज्ञोपवीतवान्।
जम्भणो मोहनः स्तम्भी मारणः क्षोभणस्तथा ॥११॥

शुद्धनीलांजन-प्रख्यो दैत्यहा मुण्डभूषितः।
बलिभुग् बलिभुङ्नाथो बालोऽबालपराक्रमः ॥१२॥

सर्वापत्तारणो दुर्गो दुष्टभूत-निषेवितः।
कामी कलानिधिकान्तः कामिनीवशकृद् वशी ॥१३॥

जगद्रक्षाकरोऽनन्तो मायामन्त्रौषधीमयः।
सर्वसिद्धिप्रदो वैद्यः प्रभविष्णुः करोतु शम् ॥१४॥